Als onder beheer by Lephalale weermagbasis

Beeld het verlede Donderdag berig dat die ouers van 50 rekrute woedend is oor hoe hulle kinders daar behandel is. Al 50 het na bewering besluit om eerder huis toe te gaan en nie hulle ses maande basiese opleiding te voltooi nie.
Noordelike Nuus het met Kolonel Willie Nieuwoudt gesels oor sommige van die aantuigings wat gemaak is. Nieuwoudt verduidelik dat slegs vyf rekrute vrywillig besluit het om die eenheid te verlaat.
“Ek doen persoonlik ‘n onderhoud met elke rekruut wat huis toe wil gaan. Al vyf het persoonlike redes gegee waarom hulle nie wou voort gaan met die opleiding nie.”
Daar is egter wel 45 rekrute afgekeur omdat hulle nie hulle mediese ondersoek geslaag het nie. “Wanneer rekrute gekeur word ondergaan hulle ‘n aanvanklike mediese ondersoek. Dit gebeur dat iemand sy of haar medies slaag ‘n jaar tot drie maande voor die innametydperk. Met iname word daar weer ‘n mediese ondersoek gedoen en as die persoon nie slaag nie kan ons hom of haar volgens regulasies nie inneem nie.”
Nieuwoudt verduidelik dat gewig ‘n groot rol speel, “die eerste ses maande doen almal dieselfde basiese opleiding. As ‘n rekruut te klein of te groot is, kan hy of sy erg beseer word in hierdie tyd. Ons is dus verplig om hulle weg te wys.”
Oor die aantuigings dat instrukteurs by die eenheid rassisties dreigemente maak, sê Nieuwoudt dat dieselfde  groep instrukteurs al by vyf inames by die eenheid betrokke was. “Daar was nog nooit enige klagte oor rasisme nie. Rekrute kan anoniem klagtes indien om hierdie tipe ding aan te spreek.”
Nieuwoudt verduidelik dat daar hierdie jaar net een iname gaan wees. “Ons neem gewoonlik twee groepe van 400 rekrute in, maar weens opgelegte beperkings sal ons hierdie jaar slegs een groep rekrute inneem. Ons behoort weer volgende jaar twee groepe in te neem”.
Rekrute is tans besig met hulle derde week van basiese opleiding. Nieuwoudt verduidelik dat loopbaan bestuurders die rekrute na sewe weke se opleiding sal toespreek om studierigtings te verduidelik sodat elkeen ‘n finale keuse kan maak oor die rigting wat hy of sy wil studeer. Hy ontken verder gerugte dat die eenheid ongeorganiseerd is en nooi enige lid van die publiek en veral ouers van rekrute uit om die eenheid te besoek om griewe met hom te bespreek.