Tieners beseer toe ‘toring’ omslaan

’n Dag van pret en plesier by Klein-Kariba se ge­wilde Studente­jol het vroeër van­dees­week vir ’n groep tieners van Rand­fon­tein in ’n nag­merrie ont­aard toe ’n Para­chute Rocket-toring om­ge­slaan het.
Agt tieners is ná die onge­luk deur Tro­mar-ambu­lans­diens se para­medici met bese­rings na die Bela-Bela-hos­pitaal op die dorp ge­bring. Van die beseerde jong mense is later ook na hos­pitale in die Rand­fon­tein-om­ge­wing aan die Wes-Rand oorge­plaas.
Twee matriek­leer­ders van Hoër­skool Jan Viljoen in Rand­fon­tein is ernstig beseer. Hulle is Estelle (Stella) Vorster (18) en Lisl van Zyl (18).
’n Merk­baar ontstelde Zandré Janse van Vuuren (18) het op Maandag, 3 Desem­ber, ná die voorval vertel sy en haar skool­maats het in die toring op­ge­styg. “Die toring het skie­lik gekantel en ons het almal geval. Van ons het bo-op me­kaar beland en het as gevolg daar­van baie seer gekry. ’n Oom wat buite ge­staan het en die onge­luk gesien gebeur het, het die plas­tiek oop­gesny om ons uit die to­ring te bevry. Hy het ook hulp ontbied.”
Nog beseerdes is Chanté Nieu­wen­huizen, Robert William­son (18), wat sy nek en rug beseer het, en Michael Pelser wat ook sy rug be­seer het. Wayne William­son (25), wat die leer­ders van Hoër­skool Jan Viljoen na die oord ver­voer het, se lin­ker­been is gebreek.
Bruce Stoltz, Stella se vriend, het gesê “Stella het baie seer gekry. Ek was juis op pad na Bela-Bela om ’n ogie oor die klomp jong mense te gaan hou, toe ek ’n op­roep ont­vang het om my in te lig dat sy ern­stig seer­ge­kry het”.
Chanté het vertel sy het ’n voor­gevoel gehad.
“Ek was baie bang en wou nie in die to­ring op­gaan nie. Toe die toring val, het ek vrees­lik geskree. Toe ek op die grond land, het ek gevoel ek kry nie asem nie. Ek was baie be­noud en het asem­nood gehad,” het sy vertel terwyl trane oor haar wange geloop het.
Wim de Wet, oord­bestuur­der van die ATKV se Klein-Kariba, het gesê daar was ten tyde van die on­geluk sowat 800 matrieks en stu­dente by die oord vir die Studen­te­jol.
Hy het gesê hoewel Tromar sy diens op Vry­dag, 30 No­vem­ber, gestaak het, het sy para­medici on­mid­dellik gaan help toe hulle van die onge­luk by Klein-Kariba in kennis gestel is.
“Ons het on­middellik al die ouers ge­kon­tak en het on­mid­dellik met ’n onder­soek na die voor­val begin.
Piet Gouws en vennote doen die on­der­soek. Hulle vlieg vandag in om die onder­soek te doen om presies vas te stel wat ver­keerd gegaan het,” het De Wet gesê.
“Ons beskou dit as ’n frats­ongeluk en betreur die feit dat die onge­luk gebeur het. Ons is egter baie dank­baar dat daar nie erger bese­rings was nie.”
Die beseerde tieners het vertel sowat agt mense word in dié Para­chute Rocket-toring in ’n sitplek vas­ge­maak. Die sit­plekke word dan met lug sowat 6 meter hoog die lug in ge­blaas. Wan­neer die toring se deur aan die onder­kant oopge­maak word, val ’n mens teen ’n vinnige spoed na onder.
Van die tie­ners wat die ongeluk gesien gebeur het, het beweer die toring was nie ordent­lik ge­anker nie en daar­om het dit omge­kantel. Dié bewe­rings is teen druk­tyd nog nie gestaaf nie.
Van die be­seerde kin­ders het by die hos­pitaal gesê hul ouers is baie ont­steld oor die voor­val en oorweeg reg­stappe.
- LiN Media/Die Pos