Nog 'n platina myn oppad!

MOKOPANE - Mynwese entrepreneur, Robert Friedland, het hierdie week tydens die mynwese indaba in Kaapstad lig op die Ivanplats projek gewerp.
Hoewel hy vaag was oor spesifieke detail rondtom die grootte, koste en tydlyn van die projek wat net noord van Mokopane geleë is, het Friedland laat blyk dat die projeksbeplanning ‘n smelter en waarskynlik ‘n veredelingsaanleg sal insluit.
Dit sal ‘n hoogs gesofistikeerde ondergrondse myn wees met minimale impak op die gemeenskappe wat op die grond bo op die myngebied woon, het Friedland gesê.
Die aanvanklike plan vir ‘n oopgroefmyn met ‘n groef van ses kilometer lank is laat vaar oor die impak wat so ‘n myn op die gemeenskap sou hê.
Gold Fields se eertydse hoof uitvoerende beampte, Ian Cockerill het glo ingestem om die hoof onafhanklike direkteur van die Ivanplats raad te word en die projek is volgens MiningMix met aansienlike hulp van Politieke leier en sakeman, Cyril Ramaphosa, aanmekaargesit.
Friendland wou egter nie bevestig of Ramaphosa se Shanduka Resources die SEB vennoot in die projek sal wees nie.
Ander mynmaatskappye se ontwikkelinge op hierdie spesifieke rif is tans op ys oor die hoë koste van ontgunning en die lae kwaliteit van die platina.