JZ bring heuningkwas Medupi toe

LEPHALALE - Eskom het verlede Vrydag die spreekwoordelike rooi tapyt vir President Jacob Zuma se besoek aan die Medupi kragstasie uitgerol. Zuma, die minister van openbare ondernemings, Malusi Gigaba, die minister van ekonomiese ontwikkeling, Ebrahim Patel en die premier van Limpopo, Cassel Matale was van die gaste wat die eerste Keteldruktoets by Medupi bygewoon het.
Die groep afgevaardigedes is eers deur Eskom se uitvoerende hoof, Brian Dames op ‘n toer van die projek vergesel. Daarna is gaste, ‘n span plaaslike en internasionale joernaliste en ‘n groot groep Medupi werkers deur die president en ministers toegespreek.
Zuma het ook by die geleentheid die knoppie gedruk om die druk in die ketel van die eerste eenheid te toets, waarna ‘n  gedenkblad ter viering van sy besoek onthul is.
Tydens sy toespraak het die president gesê energie is die lewensbloed wat SA se ekonomie aan die gang hou en volgens die regering se Geïntegreerde Hulpbronne Plan sal die aanvraag na energie teen 2030 verdubbel. “Die regering het ‘n dapper stap geneem met die besluit om Medupi te bou. Die vraag na elektrisiteit het Eskom genoodsaak om meer as R340 miljard aan projekte soos Medupi, Kusile, Ingula en ander elektrisiteitsvoorsieningsprojekte te bestee. Dit is die grootste infrastruktuurbelegging wat nog ooit in SA gemaak is,” het Zuma gesê.
Medupi se eerste eenheid sal na verwagting teen einde volgende jaar krag aan die netwerk lewer en die hele projek sal teen 2018 voltooi wees. Medupi sal dan die vierde grootste steenkoolkragstasie en die grootste droogverkoelde kragstasie ter wêreld wees en behoort vir die volgende 50 jaar genoeg krag te produseer om die hele  Gauteng van krag te voorsien.
Zuma het gesê hy is opgewonde oor die projek se positiewe impak op die plaaslike ekonomie van Lephalale en dit word, volgens hom, beraam dat die dorp se bruto produk met 95% per jaar sal styg.
“Ek is ingelig dat Eskom en sy venote reeds kontrakte ter waarde van R700 miljoen met verskaffers in Lephalale en die Waterbergdistrik gesluit het. Ongeveer 70% hiervan bevoordeel swart vroue in die streek,” het hy bygevoeg.
Hy was veral ook baie opgewonde oor Eskom se bydrae tot infrastruktuur in Lephalale en het spesifiek verwys na drie klinieke wat onlangs deur Eskom opgerig is. Hy het ook verwys na mediese toerusting ter waarde van R3.8 miljoen wat sedert 2007 aan klinieke geskenk is. “Eskom het in total al meer as R2.3 miljard in infrastrukuur in Lephalale belê. Dit sluit die bou van paaie en behuising in. Lephalale sal danksy die Medupi kragstasie nooit weer dieselfde wees nie,” het hy gesê.
Zuma het ook van die geleentheid gebruik gemaak om Eskom en Medupiwerkers geluk te wens met die vordering wat gemaak word. Met sy aankondiging dat meer as 17 000 mense tans by Medupi indiensgeneem word en dat meer as 40% van die werkers plaaslike inwoners is, het die skare Medupi-werkers egter dit duidelik laat blyk dat hulle nie met statistieke saamstem nie.
Die werkers was meer beïndruk met die burgemeester van Lephalale, Jack Maeko, wat tydens sy toespraak  gesê het dat onbillike arbeidspraktyke deur Medupi-kontrakteurs en subkontrateurs een van die gemeenskap se grootste uitdagings is.
Na die geleentheid het Eskom se uitvoerende hoof, Brian Dames aan Noordelike Nuus gesê hy is baie opgewonde oor die regering se bystand aan die Medupi projek. “Dit was vir die werkers by Medupi belangrik om te weet dat die regering die projek onderskraag en ‘n waardering het vir hulle harde werk. Dit is net weereens ‘n bewys van die groot rol wat infrastruktuur ontwikkeling in SA speel.”
Wanneer Medupi laat aanstaande jaar vir die eerste keer begin krag aan die netwerk lewer,  sal dit grootskaalse verligting bring vir die heersende elektrisiteitstekort in die land. Medupi sal teen Mei 2017 teen volle kapasiteit werk en sal Eskom se opwekkingsvermoë van die huidige sowat
43 000 megawatt met 4 600 megawatt verhoog.