Carina se debuut roman is ‘n treffer!

“Iewers langs die pad moet jou drome vir jou ge-ego word en dit is hier in die Waterberge, waar ‘n kring mense om my, genoeg in my geglo het om saam met my vanaand die verweseliking van my grootste droom te vier. Dit was my man, my ouers, my broer, vriende en onderwysers se jy-kan-dit-doen woorde wat bygedra het tot die vervulling hiervan - Wildvreemd, ‘n roman.”
So vertel Carina Stander Dinsdagaand by die boekvrystelling van haar debuutroman in haar tuisdorp, Lephalale. Met haar liriese stem lees sy vir haar ou-bekende gehoor uit die boek voor. Die woorde trek jou in en jy voel die bos om jou, die naggeluide, die vrou wat woordloos bid – die byeboer… en jy kan nie anders as om meer te wil hoor nie.
Dié digter, rubriekskrywer, kunstenaar, musikant en ma sit duidelik nie stil nie, want as jy geseën is met soveel talent moet jy daarmee woeker. Met haar twee seuns agter in die motor, reis sy en haar man Gerrit deur die land… dit is kunswerke afgee by Aardklop, ‘n lesing gee by Noordwes Universiteit, ‘n reisrubriek skryf op pad Kaap toe waar sy ook haar boek bekend sal stel.
Intussen skryf sy onverpoosd aan prosa, ‘n derde digbundel, ‘n moontlike opvolg op Wildvreemd en kinderstories saam met haar vyfjarige seun Aden. Tussendeur maak sy “skilderasies” soos sy dit noem. Dit is immers haar kuns wat haar in staat gestel het om te kan skryf .
“Ek het die boek begin skryf toe ek 19 was - ‘n beeldende kunste student op Tukkies. Een oggend het ek in die stort gestaan toe dié woorde my gedagtes onderbreek: “Stilte is ‘n oergeluid”.
Ek het dit onmiddelik neergeskryf en geweet dat dit die eerste woorde van my hoofkarakter in ‘n roman sou wees. In die 15 jaar wat gevolg het, het karakters hulle by my kom aanmeld. Ek het begin om hulle storie te vertel, maar het gou besef dat elkeen ‘n unieke, soms vreemde stem het en dat ek myself uit die storie moet skryf om hulle toe te laat om hul eie storie te vertel. Die boek het eintlik baie min van my daarin. Tog het elk van die karakters iets by my geleen. My humorsin het ek vir een gegee en die digter in my is duidelik deel van my hoofkarakter se stem.”
Oor haar ideale leser sê sy, “dit is iemand wat hulle laat meevoer, my grappies vang en emosioneel betrokke raak. Iemand wat lief is vir die natuur, ‘n leser wat verras wil word en tyd sal neem om die raaisels wat ek in die boek geplant het te ontsyfer.”
Wildvreemd is reeds in Nerderlands vertaal en sal volgende jaar as voorgeskrewe boek in Afrikaanse privaatskole gelees word.