Vonke spat oor nerf-af donkies

MOKOPANE - ‘n Poging om vier donkies wat na bewering erg mishandel is van hul eienaars te red, het Sondagmiddag byna in bloed geëindig toe lede van die plaaslike DBV, ‘n plaaslike sekuriteitsmaatskappy en die donkies se eienaars slaags geraak het.
Johan Joubert van die DBV het glo Sondag in JG Strydomstraat gesien hoe die drywer van ‘n donkiekar sy vier donkies, wat reeds erge sere en stukkende plekke aan hul velle het, glo aanhoudend met ‘n sweep slaan. Toe hy hulle daaroor konfronteer en meedeel dat hy die donkies na die skut gaan neem vir behandeling het die twee mans op die donkiekar glo gedreig om hom te lyf te gaan.
Marcelle Maritz, DA-raadslid en voorsitter van die plaaslike DBV sê dít is toe Joubert haar bel vir bystand. “Ek het dadelik vir Suricat geskakel en vir hulle gevra om die polisie te kontak vir bystand,” sê sy en verduidelik dat sy al geleer het dat die sekuriteitsmaatskappye vinniger met die plaaslike polisiestasie in verbinding kan tree as wat lede van die publiek kan.
Rassie Erasmus van Suricat het hom by Maritz aangesluit en gehelp soek na die omstrede donkiekar wat toe reeds op pad na die HOP-uitbreidings was.
Hulle het die donkiekar en sy eienaars in die veld naby uitbreiding 14 gekry. “Ons het vir hulle gesê die manier waarop hulle, hul donkies hanteer is dieremishandeling en dat dit teen die wet is en dat ons die donkies na die DBV gaan neem. In reaksie daarop het hulle gedreig om vir Erasmus met grawe wat hulle op die donkiekar gehad het te takel,” vertel Maritz. Erasmus het dit glo duidelik gemaak dat hy sal optree as hulle hom aanval.
Terwyl hulle toe vir Joubert en die polisie gewag het, het die eienaars van die donkies glo hul diere uitgespan en die veld ingejaag. Toe ons hulle vertel dat hulle dit nie mag doen nie en dat ons nou hul donkiekar gaan konfiskeer het die twee mans die donkiekar gegryp en in die rigting van die naaste huise gehardloop.
“Ons het hulle agterna gesit terwyl Erasmus met die bakkie gery het om die donkiekar en sy eienaars af te keer,” vertel Maritz. “Ons [Maritz en Joubert] het aan hulle verduidelik dat ons die karretjie gaan vat en dat hulle dit Maandag kan terugkry as hulle die donkies na die DBV bring vir behandeling.”Dit is toe dat die vonke glo spat en die twee mans na bewering met grawe omhoog in Maritz en Joubert se rigting storm."
“Hy was reg om daai graaf soos ‘n byl op my nek af te swaai toe die skoot klap,” sê Maritz.
Erasmus het toe ‘n waarskuwingskoot in die grond afgevuur.
“Ons het almal besef die situasie het te ver gegaan en dat ons sonder die polisie se bystand nêrens gaan kom nie,” het Maritz Maandag vertel en bygevoeg dat daar toe reeds twee ure verloop het vandat die eerste oproep na die polisie gemaak is. “Eers nadat ek die waarnemende distriksbevelvoerder, Kol. Lucas Mogwaneng gebel het, het ons reaksie gekry,” sê sy.
Twee polisiemanne het opgedaag en die donkiekar eienaars na die polisiestasie geneem.
Daar aangekom wou Maritz hê die polisie moet die twee mans vir dwelms en alkohol in hul bloed toets want sy meen hulle was uitermatig aggresief.
Maar die waarnemende stasiebevelvoerder, Lt-Kol. Isaac Mantjane wou nie bes gee nie. Hy het Maritz glo daarvan beskuldig dat sy inmeng met polisiewerk en dat sy, Joubert en Erasmus reg in eie hande geneem het. “Ons het vir hom probeer vertel dat ons die polisie eerste gebel het, maar hy wou niks hoor nie,” sê Maritz.
Volgens haar wou hy ook niks weet van ‘n aanrandingsklag teen die twee mans wat haar, Joubert en Erasmus na bewering wou aanval nie. Uiteindelik het hy glo vir niemand spesifiek nie, maar in die aanklagkantoor vir die ander polisielede daar gesê: “Help them open a case!”
“Almal het verdwaas vir ons gestaan en staar. Niemand wou na vore kom om ons te help nie,” vertel Maritz.
Mantjane het toe die twee mans vrygelaat en Erasmus se vuurwapen gekonfiskeer en hom meegedeel dat hy gearresteer word op aanklag van poging tot moord.
Noordelike Nuus het verneem dat die beheeraanklaer by die Mokopane landdroshof Maandagoggend geweier het om hierdie saak op die rol te plaas. Dit ten spyt was Erasmus se vuurwapen teen Woensdag nog nie aan hom terugbesorg nie.
Lt.Kol. Mantjane wou nie hierop kommentaar lewer nie en het gesê die saak is nog hangende. Hy het bewerings oor die dreigemente om Maritz en Joubert met grawe aan te val as blatante leuens afgemaak en gesê hulle moet na die polsiestasie toe kom as hulle enige klagtes het.
Oor die polisie se beweerde onwilligheid om klagte van aanranding teen die twee donkie-eienaars deur Maritz, Joubert en Erasmus te aanvaar, sê Mantjane niemand is aangerand nie. “Ons as polisie het ons werk gedoen. Ons het die DBV bygestaan in die toepassing van die dierebeskermingswet. Ons kan nie mense van aanranding aankla as niemand aangerand is nie,” het hy gesê.
Maar  Oosie Oosthuysen, ‘n prokureur van Polokwane wat intussen by die saak betrokke geraak het, verduidelik dat daar in terme van die strafproseswet nie noodwendig ‘n fisiese aanranding moet plaasvind voor so ‘n saak geopen word nie. Hy verduidelik die blote feit dat mense se veiligheid daadwerklik bedreig is, is genoeg gronde vir so ‘n saak.
Hoewel Mantjane Woensdag aan Noordelike Nuus die versekering gegee het dat daar ‘n klag van dieremishandeling teen die twee donkie-eienaars gelê is, het die DBV teen druktyd nog geen bevestiging of saaknommer in hierdie verband ontvang nie.