Plaasrowers slaan toe

MARKEN - Vier gewapende rowers het verlede Donderdagoggend net na 03:00 op ‘n plaas 5km van die Villa Nora polisiestasie ingebreek en drie inwoners op die plaas aangehou.
Jaco Pieterse, Basie Lombaard en Rina Gobey, is vasgebind en in hulle kamers toegesluit terwyl die verdagtes die huis omgekeer het opsoek na wapens en kontant.
Pieterse vertel dat die rowers eers die honde vergiftig en daarna deur ‘n kamer venster geklim het. Hulle het vir Basie en Rina vasgebind. Ek het die honde hoor blaf en was by my kluis om my vuurwapen uit te haal toe hulle instorm. Hulle het my ook vasgebind en op die vloer gegooi.”
Daar word vermoed dat die rowers opsoek was na kontant wat hulle geglo het  Pieterse, ‘n werknemer by Kudu Cash, huis toe sou bring. “Ons hou nie kontant hier aan nie, maar hulle wou my nie glo nie.”
Die rowers het na ‘n uur se gesoek op die vlug geslaan met twee vuurwapens, juwele en selfone.