En dié “blouligte”?

Het Lephalale dan nou sy eie blouligbrigade? Dit was van die vrae wat Noordelike Nuus hierdie week ontvang het oor Molalatau Sekuriteit se BBP (Baie Belangrike Persoon) sekuriteitsdiens aan ‘n sakeman in die dorp. Baie wil weet waarom die persoon met flikkerende dakligte en sirenes vervoer word en waarom die voertuig na bewering die spoedgrens oortree en selfs stopstrate verontagsaam.
Molalatau Sekuriteit se hoof uitvoerende direkteur, Wayne Derksen, het hierdie week aan Noordelike Nuus verduidelik dat die sakeman as ‘n BBP beskou word en dat hy weens doodsdreigemente Molalatau genader het om hom te vervoer. Derksen maak dit egter duidelik dat die maatskappy nie van blou ligte gebruik maak nie.
“Ons ken die wet en sal altyd daarby hou. Die ligte op die voertuig is wit en is toelaatbaar vir sekuriteitsvoertuie.” Derksen sê hy is ook daarvan bewus dat die bestuurder van die voertuig nie padreëls mag verontagsaam nie. Hy versoek die publiek om enige klagtes rakende Molalatau Sekuriteit se voertuie onder sy aandag te bring.
Volgens die voorsitter van die gemeenskapspolisiëringsforum, Thys Eloff, beteken die gebruik van flitsende ligte vir die publiek dat die persoon reg van toegang het. Hy het egter met Kaptein Joseph Kwadi van die streekspolisie bevestig dat geen publieke voertuig  stopstrate of verkeersligte mag verontagsaam of reg van toegang mag geniet nie, selfs al flits daar ligte op die dak.
“Dit is nie vir my duidelik waarom die man met flitsende ligte vervoer moet word nie, ek sal dit met Molalatau Sekuriteit opneem,” het hy Woensdag aan Noordelike Nuus gesê.