Raaiselagtige aanval op hond

Dit was ‘n noue ontkoming vir Pinkie, ‘n wors-bokkiehond-kruising toe sy Saterdag-aand in Onverwacht aangeval en met ‘n skerp voorwerp geslaan is. Ralie Bridges, Pinkie se eienaar vertel dat sy net na 20:00 saam met Pinkie uit hulle eenheid in Zebra village gestap het. 
“Pinkie het om die huis gehardloop en oomblikke later hard begin tjank. Ek het histeries na haar geroep, want ek kon hoor dat sy baie seergekry het. Sy het van agter af om die huis gehardloop en teen ons opgespring, dit is toe ons die bloed sien.”
Wat presies met Pinkie gebeur het bly ‘n raaisel, maar die veearts wat haar behandel het glo dat die klein hondjie met ‘n ‘n skerp voorwerp geslaan is. Die sny is tot op die been en kans vir infeksie bly ‘n bekommernis.
“Van nou af bly sy in die huis, ‘n mens se diere is nie eers veilig nie,” het Ralie Maandag aan Noordelike Nuus gesê.