Straatname voortaan op randstene

Mokopane se straatname sal eersdaags op randstene by straathoeke aangebring word omdat vandale en ysterdiewe die naambordjies eenvoudig te vinnig breek of steel.
Tydens verlede Dinsdag se gemeenskapspolisiëringsforum vergadering het die forum se voorsitter, Andy Goetsch, terugvoer gegee op ‘n onlangse vergadering tussen die munisipaliteit en die plaaslike besigheidskamer. By dié vergadering is ooreengekom dat straatname met verf op randstene aangebring sal word.
Goetsch het verduidelik dat dit noodsaaklik is vir besoekers aan die dorp en veral vir nooddienswerkers om straatname te kan lees.
Hy het inwoners ook versoek om duidelike huisnommers voor hul
wonings aan te bring.
“In ‘n noodgeval kan dit iemand se lewe red as die ambulans of brandweer jou perseel maklik kan identifiseer,” het hy verduidelik.
Hy het ook gevra dat mense wat op plase en kleinhoewes buite die dorp woon hul eiendomme duidelik sal merk.