My kind word geboelie

Insidente waar kinders, en selfs onderwysers, onder geweld in skole deurloop het die afgelope paar maande baie aandag in die media geniet. Skokkende beelde van geweld is op selfone vasgevang en die wêreld ingestuur, net om bekommerde ouers nog meer bekommerd oor hul kinders se veiligheid in skole te maak. Hoe groot is die probleem? Word ons kinders in plaaslike skole geboelie? 
Noordelike Nuus het hierdie vraag aan lesers op Facebook
gestel en dit was gou baie duidelik dat veral laerskool kinders se ouers bekommerd is oor die aantal voorvalle by skole. Baie ouers meen dat die skole nie genoeg doen om boelies te straf en hulle kinders te beskerm nie.
Die departementshoof vir opvoedkundige leiding by Laerskool Bosveld Primary, Karin Meyers, stem nie saam nie. Sy meen dat nie alle gevalle van spot of geweld as boelie beskou kan word nie. “As een kind ‘n ander op die stoepe stamp, is dit ‘n oordeelsfout en moet hy daaroor aangespreek, en waar nodig, gestraf word. Dit is egter nie noodwendig boelie nie. Wanneer dit gereeld oor ‘n tydperk gebeur dat dieselfde kind die ander stamp of spot, kan ‘n mens dit as boelie beskou. In dié geval het die skool dissiplinêre stappe wat gevolg word. So ‘n kind se ouers word ingeroep en albei kinders sal na een van die vier terapeute by ons skool verwys word. As ‘n ouer vermoed dat sy kind geboelie word moet hy dadelik ‘n afspraak met die skool maak sodat die saak ondersoek kan word.”
Verdere kommentaar op ons Facebook vraag was dat kinders wat geboelie word self moet
terugbaklei en hul man staan. Meyers glo egter dat hierdie raad van ouers aan kinders net die probleem vererger. “Deur aggressief op te tree plaas die kind ‘n teiken op sy eie kop vir die
boelie om net voort te gaan omdat hy reaksie gekry het.”
Plaaslike sielkundige, Karel Botha, stem saam dat aggressie nie die antwoord is nie. “Dit is gewoonlik die stil, sensitiewe en goed gemanierde kinders wat deur boelies geteiken word. Dit is belangrik dat kinders wat geboelie word sal leer om hulself te laat geld sonder na op die vlak van die boelie af te daal. Waar dit moontlik is ignoreer die boelie, want aggressie of geweld gaan nie die probleem oplos nie”
In meeste gevalle is die boelie, volgens Botha, ‘n kind wat inherent ongelukkig is. Hy wil sy ongelukkigheid oordra aan ‘n kind wat vir hom gelukkig lyk en wat ‘n maklike teiken is. Deur die maatjie seer te maak voel hy beter oor sy eie omstandighede en homself.
Botha glo ook dat ‘n boelie dikwels ‘n kind is wat aan depressie ly. “Ek sien daagliks meer en meer kinders wat as gevolg van omstandighede en te veel druk van ouers om te presteer, depressief raak. Dit veroorsaak dat hulle bakleierig en geïrriteerd raak met mense om hulle. So ‘n kind se skoolwerk gaan agteruit en hy of sy verloor belangstelling. Hy baklei dan teen die “sleg voel” en dit is gewoonlik dan dat ander kinders daaronder lei.”
Vir Botha lê die antwoord nie noodwendig by die skool nie, maar eerder in die huis. “‘n Kind wat geboelie word se selfbeeld word afgetakel. Woorde soos “loser” vertel vir die kind dat hy niks werd is nie. Hier kan die ouer intree en die leun weerlê. Gee genoeg aandag en maak seker dat jou kind onder goeie toesig is na skool.”
Petro van der Walt, maatskaplike werker van Bravo Jeug, raai ouers aan om gereeld uit te vra oor maats by die skool en om die kommunikasie kanale oop te hou.
“Baie kinders vertel nie vir ouers of onderwysers as hulle geboelie word nie, tog het dit ‘n groot uitwerking op hulle emosies en gemoed. Jou kind moet weet dat jy as ouer sal luister en hulle sal glo.”
Sy gee ook die volgende raad:
• Indien jou kind oor ’n tydperk, verskeie kere deur dieselfde kind geteister word, moet jy die skool daaroor inlig. Onderwysers kan nie orals wees en alles sien nie. Ons ondervinding is dat die skole dadelik optree sodra hulle daarvan bewus word.
• Bou aan jou kind se selfvertroue. Leer hom om homself te laat geld. Jou kind moet weet haar opinie is belangrik. Leer hulle hoe om “nee” te sê.
• Doen byvoorbeeld rolspel aktiwiteite waar jou kind kan leer hoe om die boelie te hanteer. 
• Leer hom of haar om weg te stap (iets wat vir kinders moeilik is om te doen). As die boelie nie vermy kan word nie, raai jou kind aan om pouses in ‘n groep te beweeg.
• Aan ouers van boelies gee Botha die volgende raad:
• Kinders wat ander kinders boelie se ouers moet hulle sterk hierteen uitspreek.
• Jou kind moet weet dat dit verkeerd is om ‘n ander kind te spot of seer te maak.
• Moet nie onderwysers se gesag voor die kind in twyfel trek nie. Baie ouers vandag is nie ‘n voorbeeld vir hulle kinders as dit kom by respek vir gesag nie. Die kinders hoor amper daagliks hoe sleg die polisie en selfs hoe sleg onderwysers is.
• Boelies glo dikwels dat hulle nie in die moeilikheid sal kom nie, daar moet egter gevolge vir hulle aksies wees.
• Wees baie versigtig wat jou kind op TV kyk, daar is uitermatig baie geweld in TV programme.
• Wees ‘n voorbeeld vir jou kind in hoe jy jou man of vrou hanteer. As jou kind geweld in die huis beleef gaan hy dit elders uitleef. Drank speel ook hier ‘n groot rol.
Indien jy vind dat jou kind depressief is of emosioneel swaartrek as gevolg van byvoorbeeld ‘n egskeiding kry die nodige hulp.

Op ‘n Laerskool badkamervloer lê ‘n Graad 2 seun, sy voorste tandjies is stukkend en sy lip bloei waar ‘n stuk gebreekte teel nog in sy mond vassit. Minute van te vore is hy deur ‘n Graad 4 seun teen die badkamermuur gestamp.
Hierdie is maar net een van baie voorbeelde van geweld in plaaslike skole wat ouers op die Noordelike Nuus Facebook blad geplaas het.  In die spesifieke geval voel die ouer dat die skool nie genoegsaam teen die boelie opgetree het nie. Hoewel meeste plaaslike skole ‘n baie streng beleid volg om voorvalle van boelie hok te slaan, sal so ‘n insident nie noodwendig as boelie beskou word nie.
Slegs wanneer dieselfde kind oor ‘n tydperk herhaaldelik geteiken word sal die skool dit as boelie beskou en die nodige stappe neem. - Valerie Cilliers  (valerie@nordnuus.co.za)