Goeie ondersteuning vir Rooi Oktober

Sowat 40 voertuie het verlede Vrydag oorkant die begraafplaas in Onverwacht bymekaargekom om aan die jaarlikse optog teen plaasmoorde deel te neem.
Die voertuie het in gelid gery na die veilingskrale op die Marken pad waar ‘n kort toespraak gelewer is deur Henk van de Graaf, assistent hoofbestuurder van TLU-SA.
Van de Graaf het gesê dat boere paraat moet wees en dat hulle nie moet wag tot die verdagtes in hulle huise is nie, “die verdagtes moet buite julle hekke al gestop word!”
Hy het ook statistieke met die boere gedeel en duidelikheid gegee oor hoe ernstig die plaasmoord-kwessie in SA is. Verskeie boere wat al slagoffers was het hulle ervarings gedeel. Rooi ballonne is in die lug opgelaat om die onskuldige bloed wat in Suid-Afrika vloei te simboliseer.