Roodt seuntjie sterk aan

Die twintig-maande-oue Martin Roodt van Mokopane wat op 11 Oktober sy gesin in ’n tragiese motorongeluk verloor het (“Net seuntjie oorleef ongeluk”, 17 Oktober), is uit die hospitaal ontslaan en sterk tans goed aan.
Klein Martin het die kop-aan-kop botsing waarin sy ma Thea, sy pa Frik en sy vyfjarige sussie Inamarie op die N1 buite Hammanskraal gesterf het, oorleef.
Hy is verlede Vrydag, ses dae na die ongeluk uit die George Mukari Hospitaal, waar hy mediese behandeling ontvang het, ontslaan.
Die skoueroperasie wat hy sou ondergaan was onnodig, het ’n familielid aan Noordelike Nuus gesê. Sy linkerbeen en arm is egter in gips.
Die Roodt gesin word Vrydag (vandag) vanuit die NG Kerk in Mookgophong
(Naboomspruit) begrawe.
Die familie het hulle dank uitgespreek teenoor elkeen vir die ondersteuning, gebede en medelye.