Tafelronde skenk R102 000 vir bejaardes

MOKOPANE - Die Tafelronde Kameeldoring '92 se opbrengs by die biertent van vanjaar se Kierieklapper Kunstefees het ’n fenomenale R102 000 vir die Potgietersrus Dienssentrum vir Bejaardes opgelewer.
Besoekers uit alle oorde het soos elke jaar die Kierieklapper Kunstefees ten bate van die Dienssentrum ondersteun. Die biertent het ook oudergewoonte as ’n oase by die fees gedien en duisende mense se dors geles. Danksy hierdie mense en die Tafelronde Kameeldoring '92 wat die biertuin jaarliks behartig is ’n stewige tjek van R102 000 aan die kunstefees se voorsitter, Johan Kirchner oorhandig.
Die Tafelronde het ook hulle dank uitgespreek teenoor elke skenker en ondersteuner vir hulle onderskeie bydrae by vanjaar se biertent.