Wetenskaplike mynbaas soek nie ‘stories’ nie

MOKOPANE - Albert Jordaan, die projekbestuurder vir beide Sylvania Platinum se Grass Valley en Volspruit projekte suid van Mokopane sê hy is ‘n wetenskaplike en steur hom nie aan boere se “stories” oor boorgate wat opgedroog het toe Grass Valley se skagte in die 1980’s ontwater is nie.
Dewald de Beer jnr het tydens ‘n gemeenskapsvergadering Dinsdag vertel hoe sy ouers se boorgate 5km van die myn af oornag opgedroog het en die Nyl Aksiegroep se prokureur, Emile Honiball, het ‘n brief van Ken Smit voorgelees wat vertel hoe Moorddrift se boorgate eers in die 1990’s herstel het na Grass Valley se ontwatering in die 1980's.
Jordaan sê Sylvania beplan nie om dadelik die ou ondergrondse skagte, van ongeveer 250m diep, te ontwater nie. Verdere studies sal eers gedoen word, sê hy.
Boere in die omgewing voel Sylvania stoomroller die mynaansoek deur sonder om die risiko wat ‘n myn vir landbouaktiwiteite inhou behoorlik in ag te neem.
Dr. Eugene Gouws wat die geaffekteerde omgewing se landbouproduksie vir die omgewingsimpakstudie nagevors het, sê die area het diep rooigrond met hoë landboupotensiaal, maar vanweë lae reënval en ‘n kort groeiseisoen is boere in die omgewing afhanklik van grondwater. Hilary Knight, ‘n beesboer van die omgewing beaam dit. “Elke druppel water wat elke bees drink, kom uit ‘n boorgat uit. Sonder grondwater kan ons nie bestaan nie.”
Jordaan sê egter mynwese verdien baie meer geld en maak ‘n groter bydrae tot die ekonomie as landbou. “Wat help dit ons het voedselsekerheid, maar ons het nie geld om mee kos te koop nie.”