Man (41) verdwyn spoorloos

Gerrie, wat vir Engen Petroleum werk doen, het gistermiddag sy werkers by die Padi Motors Motorhawe gaan aflaai waar hulle besig was om te werk. Hy het toe gery om boumateriaal te gaan koop.

"Een van die werkers het ons omstreeks 17:00 gebel en gesê dat Gerrie nog nie terug was nie," het Gerrie se skoonsuster, Sarie Greyling gesê. Sarie het Gerrie se selfoon geskakel maar dit het net gelui. "Die eienaar van die motorhawe en die werker het uitgery en die bakkie skaars 11 minute van die motorhawe af gevind, maar Gerrie was nie by die voertuig nie."

Netstar is geskakel en daar is bepaal dat die bakkie om sowat 12:30 afgeskakel was. Netstar is toe ook uit na die toineel, maar daar was steeds geen teken van Gerrie nie. Intussen het Sarie 'n saak by die polisie aanhandig gaan maak en HPG is gisteraand genader vir hulp.

HPG, 'n groep kundige polisie reserviste wat die polisie bystaan by misdaadtonele, is gisteraand uit na die toneel. Die area word as bergagtig beskryf en die bakkie staan in die Cheunespoort self, het Sarie gesê. Hulle hoop is dat HPG hulle sal kan bystaan om Gerrie ongedeerd te vind.

Noordelike Nuus was vanoggend met HPG in verbinding en volgens hulle is Gerrie se beursie nie in die voertuig nie en die bakkie was nie gesluit nie. Daar is tot dusver geen spore gevind nie en die ondersoek duur vanaf vroeg vanoggend af voort. "Die bergagtige terrein maak dit moeilik, maar ons is besig met 'n ondersoek."

Gerrie werk al die afgelope drie weke in die area en het die gebied goed geken. Hy word beskryf as 'n stil, geestelike mens wat uiters verantwoordelik is en nie sommer sonder sy selfoon die voertuig sou verlaat nie of die voertuig te sluit nie.

Enige iemand wat dalk inligting het oor waar Gerrie moontlik kan wees word gevra om Sarie direk te skakel by 082 828 0861 of 012 808 3428.