Feestyd in die Bosveld

LEPHALALE - Die kroning van Mej Bosveld is elke jaar ‘n groot gebeurtenis en hierdie jaar se spogfunksie met die “Out of Africa”-tema het gesorg vir ‘n stampvol gehoor by die Mogolklub funksiesaal verlede Vrydag.
Lephalale skoonheid Malinda du Plessis, ‘n leerder by Hoërskool Ellisras, het met die titel as Mej Bosveld weggestap, terwyl die pragtige Talitha Bothma as eerste prinses gekroon is en Zheree Havenga kan spog met die titel as tweede prinses.
‘n Nuwe kategorie wat hierdie jaar bygevoeg is, is die Mej Bosveldnooi titel wat deur Cherese Visser gewen is. “Hierdie titel is uitsluitlik vir ‘n meisie wat in Lephalale woon en sy sal ook verantwoordelik wees vir gemeenskapwerk in die dorp,” het Lenie Pieterse, ‘n organiseerder van die kompetisie, verduidelik.
“Die groot wenner is Mej Bosveld, maar haar pligte is meerendeels rondom die Bosveldfees gesentreer, terwyl die Mej Bosveldnooi vir die tydperk van haar kroning ‘n verantwoordelikheid teenoor Lephalale as dorp het.”
Volgens Pieterse was die kompetisie tussen die meisies baie straf hierdie jaar. “Die standaard was ongelooflik hoog en dit kon veral tydens die onderhoude met die deelnemers gesien word.”
“Ek was baie dankbaar dat ek nie hierdie jaar ‘n beoordeelaar was nie, want ek sou beslis nie tussen die meisies kon kies nie!”