Rowers teiken sakevrou in winkelsentrum

MOKOPANE - "Ons het almal groot geskrik," het een winkeleienaar in die Mokopane Mall gesê nadat wapende rowers glo 'n sakevrou se handsak gegryp het en uitgehardloop het net voor 11:00 vanoggend.

Intussen het die Mokopane polisie laat weet dat hulle opsoek is na twee verdagte mans. In hul verslag noem hulle dat die verdagtes die sakevrou en 'n kollega beroof het, terwyl hulle oppad was om geld te gaan bank.
​"Die twee mans het wapens op die slagoffers gerig en geld geeïs," sê sersant Irene Masingi van die Mokopane polisie. Sy voeg by dat die mans op vlug geslaan het met die geld.

Volgens ooggetuies het 'n man wat die roof gesien gebeur het, dadelik die verdagtes agterna gesit, waarna een verdagte 'n handwapen uitgeruk het en 'n skoot by die uitgang van die winkelsentrum afgevuur het.

Een patroondoppie is op die toneel gevind.

Die polisie ondersoek duur voort.