Skoolbanke finaal vaarwel toegeroep

Noordelike Nuus se kameralens het vanoggend op ’n groep matriek leerders van Hoërskool Piet Potgieter (HPP) gefokus, enkele minute nadat hulle amptelik hul laaste eindeksamen vraestel geskryf het.

’n Groep matriek seuns het breed geglimlag terwyl hulle uit die eksamenlokaal uitgestap het. Hulle bittere eksamenstryd het vandag finaal geëindig nadat hulle hul penne neergesit het vir die derde Afrikaanse vraestel.

“Dit is uiteindelik tyd vir vakansie, die taai stryd is verby,” het een van die seuns gesê.

Matriek vakansie is ’n groot tendens. Duisende skoolverlaters begin reeds hul tasse pak om ’n hoofstuk in hul lewe finaal vaarwel toe te roep en te vier by verskeie vakansiebestemmings waar massas matrieks jaarliks byeenkom.

Noordelike Nuus wens al Mokopane en Lephalale se skoolverlaters sukses en voorspoed toe vir hul toekoms.