‘n Voorsmakie van Interhoër
Soretha Kruger van Piet Potgieter het die skyfwerp vir dogters o/17 asook die 100m gewen. Sy is aangewys as Victrix Ludorum. Haar grootste kompetisie op provinsiale vlak, Johané Kruger van Lephalale ding op skole-vlak o/16 mee hierdie jaar. Sy is tans besig om te herstel van ‘n skouer besering.
Om atlete voor te berei op die strawwe kompetisie en streng reëls wat hulle op 22 Februarie by die Interhoër atletiek byeenkoms en ook streek, distrik, provinsiale en dalk nasionale byeenkomste hierdie atletiekseisoen te wagte kan wees het Hoërskool Piet Potgieter verlede Vrydag ‘n
vriendskaplike byeenkoms op sy sportvelde aangebied.
Hoërskole Piet Potgieter, Hans Strydom, Ellisras, Louis Trichardt en Tom Naudé het aan die byeenkoms deelgeneem met Piet Pot wat koning gekraai het met 775 punte.
Hans Strydom was tweede met 625 punte, Louis Trichardt derde en Ellisras Vierde.
Tom Naudé se tekort aan dogters atlete was duidelik met dié skool wat in die laaste plek geëindig het met 310 punte.
Charlotte Eckard van Ellisras Hoërskool het die 100m vir dogters o/19 gemaklik gewen.
Rudolf Jacobs van Piet Potgieter en Corman Vos van Ellisras het die toeskouers op hul voete gehad in hul kop-aan-kop 100m wedloop. Rudolf het met ‘n haarbreedte gewen.
Marnus Uys van Hoërskool Piet Potgieter is moontlik die vinnigste o/16 100m atleet in Suid-Afrika. Hy het Vrydag gewys hy is gereed vir interhoër en watookal daarop mag volg. Besoek Noordelike Nuus op Facebook vir meer atletiefoto’s.
0 Comments