Is ons dan in Dullstroom?

Besoekers aan Machauka Lodge sal vergewe word as hul Saterdag gedink het dié spogherberg en eetplek is in ‘n forelplaas omskep. Leo’s Sport het vlieghengelinstrukteur, Hannes Venter, ingebring om ‘n paar plaaslike manne en vroue kom touwys maak in die fynere kunsies van vlieghengel. Sarel Haasbroek, eienaar van Leo’s Sport sê mense wat hierdie slypskool misgeloop het moenie bekommerd wees nie, dit is maar die eerste van sy soort wat Leo’s gaan aanbied. Die eerste kursus is bloot ‘n bekendstelling aan vlieghengel en voornemende en ervare vlieghengelaars kry ‘n teoretiese oorsig oor vlieghengeltoerusting, word geleer om ‘n vlieglyn te gooi en kry dan nog ‘n klaskamerles oor entimologie en watter kunsvlieë gebruik word om watter insekte na te boots.